5月先嚟過香港唱謝安琪BB首《山林道》、獲網民like爆嘅美國海軍第七艦隊樂隊「遠東分隊」，昨日又嚟香港迪士尼夾band，仲用廣東話唱咗首Beyond嘅《喜歡你》，真係入鄉隨俗，呢啲咪叫支持本土文化囉！
支持本土就唔係得個講字，昨午34℃烈日當空，美國海軍樂隊都唱咗5首歌，仲要着住長袖衫，連主音Emily都忍唔住嗌熱，夠晒誠意。觀眾就越聽越high，一聽到《喜歡你》前奏已興奮到歡呼拍掌！
Emily上網做足功課，佢話知《喜歡你》喺香港人人都識，歌詞又正先會揀呢首歌。雖然Emily就話好鍾意香港文化，又話廣東話好靚，但就好坦白咁話廣東話好難學，Emily唱過7種語言嘅歌，識唱吓日文歌、西班牙歌，但都話搞唔掂！Emily仲成日講「I love Hong Kong」，真係識做！