行政長官卓越教學獎昨向41位教師頒發卓越教學獎及嘉許狀。香港四邑商工總會陳南昌紀念學校老師柳智軒獲頒「特殊教育需要」卓越教學獎。手執教鞭十年嘅佢原為職業治療師，一次搭渡輪時見有智障成人唔敢搭船，令佢萌生做老師嘅念頭，用「及早介入」令智障人士從小得到適切教育。
柳又提到，自閉症智障學生較執着程序，倘次序有變，易情緒波動，所以用圖卡指示效果會較好。試過有學生太鍾意上佢堂，每次落堂都喊住唔捨得走，結果佢用圖卡寫個程序表，以落堂前「洗手、洗臉、熄燈」提示學生要落堂，學生從此再無扭計。
另一位獲「數學教育學習領域」卓越教學獎嘅順德聯誼總會鄭裕彤中學數學科老師周禮深，教學經驗雖然只得5年，但佢嘅教學策略已經多多，平日上堂會變魔術、玩遊戲同自製教具，「透過多元化教學可以提高學生學數嘅興趣，尤其用視覺、觸覺可以幫同學理解抽象數學概念，例如會用圖像解釋多項式、甚至自製直角三角形實物教具解釋三角比。」