跌完又跌，跌完再跌？！英國脫歐之後，英鎊曾經跌穿10算，趁這個掃貨好時機，我們幫大家看勻幾個最為港人熟悉的英國入貨點，看有甚麼貨品最抵買！文末仲有網購tips，唔好錯過。 (文中價錢以2016年7月6日每100港元兌10.0659英鎊計算)
一、Le Creuset鑄鐵鍋
雖然大家都愛紫色花形鍋，但經典款當然最具指標性。堪稱經典的28cm紅色鑄鐵鍋，香港零售價為$5,038，以英鎊結算，網購龍頭大哥亞瑪遜連運費售£192（約$1,933），平香港行貨價一半有多！不過低處未算低，除稅後，英國百貨公司Harrods連運費賣£170.8（約$1,719.5）；Selfridges則賣£171.4（約$1,725.5），Harrods以6蚊港幣之差微微勝出，成為三個購物點中嘅最低價！
二、德國WMF壓力鍋
曾經獲消委會推薦嘅德國品牌WMF，最新推出的Perfect Pro 6.5公升壓力煲，香港崇光百貨單賣一個要$4,980，就算減價期間最便宜都要$2,550，識買一定係上網買。呢個款Harrods冇得賣，即睇Selfridges同亞瑪遜。除稅後連運費計，用港幣結算，Selfridges只需$1,910，比亞瑪遜賣$2,361平$451！
記者發現，今次呢款煲用港幣而不用英鎊結算，原來更抵買。有時侯，同一個網站用不同貨幣結算，埋單價錢會有多少分別，大家付款前，記得檢查哪種幣值最划算！
三、百年歷史琺瑯餐具Falcon Enamelware
餐飲界常用， 有近百年歷史，能進廚房也能上大場面的琺瑯餐具Falcon Enamelware，香港行貨經常缺貨 ，今次就看看這套人稱入門必備的Pie Dish套裝。Falcon Enamelware官網賣£48，買滿£125可免國際運費，但買不夠的話，就要付£35。除稅後兌港幣，官網價盛惠$834，比較埋亞瑪遜（£90.37）同Selfridges（£66.96），Selfridges除稅後兌港幣只需$674就買到一套Pie Dish，抵呀！
慳到盡！網購貼士：
Tip 1： 付運香港自動退稅──在英國百貨公司網購，結算時送貨地址寫香港，會自動退稅20%。
Tip 2： 比較貨幣揀最抵──同一個網站，選用不同貨幣結算，埋單價錢會有多少分別，大家付款前，記得檢查哪種幣值最划算！
Tip 3：集運計價要留心──與其在多個網站分開付款付幾次運費，又或遇着部份賣家未必將貨運到香港，可考慮盡用網站英國免運費安排，即使沒得退稅，也分分鐘更化算。但記得留意，不同公司的計價方式唔同，大型物件有機會以體積比乘重量計，要看清楚。
記者：黃樂雯