今屆立法會即將曲終人散，大主席曾鈺成講到明唔再玩，一班議員噚晚就為曾鈺成餞行。曾鈺成平時主持會議一派嚴肅，實情相當玩得，八方喺早前嘅同樂日見識過，但噚晚嘅餞別晚宴先見真章。
噚晚嘅晚宴只係招呼議員，不分左中右，連社民連長毛梁國雄、無政黨黃毓民都有去，唔似某啲人咁，親疏有別。開飯前先嚟切蛋糕環節，大家送咗個主席椅蛋糕畀曾鈺成，算係答謝佢。
之後餘興節目就由曾鈺成負責唱歌娛賓，佢先由立法會色士風王盧偉國伴奏下獻唱一曲《忘盡心中情》，不過係改歌詞版，無論係AV仁、長毛、毓民，還是大輝、怪醫，到黨友黃定光、蔣元秋、Tree根等，無不被大主席「唱」盡。
之後大主席再唱一曲，但重點唔係首歌，而係佢出動埋太太伴舞，估你唔到，曾太嘅舞技仍然相當靈巧，直頭係令人賞心悅目。聽講大主席嚟緊仲有一場餞別晚宴，主要係秘書處仝人為大主席餞行。