面書對唔少家長真係夢魘，驚囝囝囡囡沉迷，淨係識喺網上溝通，但見到真人就口啞啞，甚至連面書老闆朱克柏格本身都係宅男。不過因為面書嘅網絡太廣泛，消息一喺面書流通，真係好快傳遍世界；好似早前銅鑼灣書店店長搞記者會，大爆附近強國嘅強力執法機關惡行，其中一個方法就係面書直播，強國想河蟹都唔知點落手；又好似呢個星期，傳真社就大爆，出口去新加坡嘅國產地鐵，質素唔掂打回頭，又喺面書分享大量有力證據，所以朱克柏格真係幫咗全球消息流通，應該頒個諾貝爾和平獎畀佢。
講起面書直播，周二曼聯亦喺官方面書直播摩連奴首個記者會，小弟做緊歐國盃功課期間，都留意吓摩連奴又有咩偉論，講真佢冇開名暗寸雲格超過十年冇冠軍，真係低莊咗啲，今時今日曼聯喺英超最大對手，點睇都唔係阿仙奴，而係曼城啦，夠薑咪同哥迪奧拿鬥多盃囉。
另一個焦點真係好笑，摩連奴嚟緊其中一個目標係提拔新人，仲振振有詞講自己職業生涯提拔咗49人；我唔知49呢個數啱唔啱、多定少，但佢喺車仔已經浪費咗盧卡古、奇雲迪布尼、穆罕默德沙拿、賴恩貝特蘭等等，如果呢班人留喺車仔，新任領隊干地一定當佢契爺咁拜。英格蘭出局，最可惜就係拉舒福特（圖），佢後備入親場都有好表現，不過摩連奴又要打番起朗尼，又要重用契仔伊巴，拉舒福特有幾多機會真係心照，唔好畀小弟批死，睇吓季中拉舒福特又會唔會被借去低組別球隊尋求上陣機會啦。
文：牽牛