求驗客手記:球迷搞專頁反對空降富力踩場有so咩?

求驗客手記:球迷搞專頁反對空降
富力踩場有so咩?

足總港超聯工作小組周二開會後,突然話今季港超除港甲亞軍港會升班,仲建議接納中超廣州富力派青年軍同埋港菁參賽;雖然有關建議仲要等下周一董事會拍板,但主席梁孔德會後就話今季會好熱鬧。球迷同球會就唔係咁諗,前晚有球迷喺Facebook開設「不要特事特辦 還我香港超聯」專頁,仲發起一人一相及一人一信,呼籲以行動反富力「空降香港」。
由於夢想駿其缺乏贊助退戰,申請留級嘅黃大仙又同贊助商傾唔掂,港會又未必升班,足總同球圈中人都擔心會唔會得番八隊;點知港超聯工作小組開完會話有富力、港會同港菁參戰,突然有11隊,我求大俠聽到都嚇親,不過,球圈中人同球迷,對足總畀國內球會越境參戰有唔同睇法。

「破壞咗港超聯個構思」

有位球迷Bruce Lam憤然搞Fb專頁呼籲球迷一人一相反對,佢仲貼文話,富力獲足總「特權豁免」,變相用港超資源培訓國內青年球員,對本地年輕球員不公,又破壞升降制,有違「香港本地」足球聯賽原意!除非捐贈5,000萬畀香港足球作培訓;否則唔應該搞呢啲損害香港足球嘅政策!群組仲叫球迷自拍手持標語嘅相或片,post上自己wall度,同埋post喺「不要特事特辦 還我香港超聯」,又或者dislike都得,以實際行動反對富力。
本地著名足球評員李德能早前撰過文講國內球會來港參賽問題,求大俠噚日同佢傾,佢話:「𠵱家實在睇唔到多隊外來球隊嚟踢港超聯,可以令到整個聯賽增值,亦諗唔到合邏輯嘅理由去支持。」東方總監梁守志亦都話:「既然現有10隊,仲係咪有需要邀請多隊,搞到11隊踢呢,照睇未必有咁嘅需要囉,亦可能破壞咗港超聯嘅構思,如果富力嚟贊助個盃賽,又支持足總搞青訓等,就值得考慮嘞。」

噚日猛強調富力係香港上市公司嘅足總主席梁孔德(右),話同富力傾緊細節問題,仲要等董事會拍板至成事。
資料圖片

梁孔德:富力係香港上市公司

足總主席梁孔德噚日同我求大俠講,同富力傾緊細節,等董事會研究,目前仲未成事,但佢就再提富力喺香港上市,百分百係香港公司,組隊未必用廣州富力,可能用香港富力都唔定,所以就等足總同富力傾完細節,覺得對香港足球冇益先去反對都未遲;求大俠同球迷都希望呢個真係好消息啦。
另外,中甲嘅深圳佳兆業噚日宣佈,搵咗荷蘭名宿、踢過皇家馬德里嘅施多夫嚟做教練,唔知喺佳兆業踢攻中嘅港腳保連奴,可唔可以喺新帥身上偷吓師呢?