馬會喺今個周末會開番韓職。雖然韓職唔好似中超或日聯咁多球星，不過佢哋啲球隊有踢亞冠盃兼成績幾好，所以球迷應該唔太陌生囉。
馬會好耐之前都有韓職，但因為呢個亞洲頂級聯賽太多蠱惑嘢而停咗五年幾，去到今年先開番。查實馬會亦係喺中途開盤，皆因今季韓職已踢咗18輪，打多15輪就會完成常規賽。韓職好似蘇超咁，常規賽前六同埋後六會分成爭標組同埋護級組，之後再踢五輪，所以賽制都幾複雜，球迷投注時要留意。至於啲開波時間都幾好，係踢晏晝一點至到夜晚七點，而且多數踢星期六、日，令到球迷有多個選擇，唔使吓吓要睇日聯或者澳職。
講番今季韓職，表現最好嘅對上兩季冠軍全北汽車，目前佢哋以36分排榜首，領先教練係南韓名宿黃善洪嘅FC首爾六分。至於韓職雖然唔多球星，但都算有份量，好似全北汽車前鋒李東國、FC首爾前鋒朴主永同埋FC城南中場金斗炫咁。