香港5月零售總額跌8.4%，除了是連續第15個月下跌及跌幅擴大，零售管理協會主席鄭偉雄更大膽預測，起碼要「衰到」去2018年。2016年只過了一半，已對明年「打定輸數」，想一想也恐怖。市道低迷，更有開始擴散迹象。於旺區經營茶餐廳的朋友跟密西比說，近期生意已由「唔掂」升級至「好唔掂」。
朋友說：「唔好以為淨係賣貴嘢商戶受影響，我哋呢啲做平價市場嘅小商戶，生意都好唔掂……我哋雖則一個餐連杯嘢飲，最平60元有找，但都有受市道差影響，就係近幾個月，舖頭中午飯嘅生意，最少比年初嗰陣跌成20%，市道確實好唔掂。」
莫非大家「練仙」不吃午飯？朋友笑指密西比今次猜對了，大家「真係唔食晏」。他說：「有啲做名牌sales嘅熟客同我講，由於生意差咗好多，佣金大減，收入由最高峯期嗰陣大約5萬元、6萬元，跌到𠵱家唔夠2萬元，咪慳啲唔出街食飯，帶飯食囉。」
怎麼辦？友人聳聳肩說：「我又反問返你，大環境咁差，仲要係個勢係會繼續差落去，可以點？」又要「等運到」？
密西比