「可能學嗰分幾鐘（動作）已經要睇成千次，一路重複去睇，睇下佢隻手做緊啲咩，佢隻腳點行。」在香港玩步操樂團，除了難以找到場地練習，旗隊成員亦找不到本土教練，要靠自己上網看影片自學，雖然過程困難，但阻不到他們追尋夢想，「我點都會出國一次去外國接受正統嘅訓練，一定要成功！」
記者：梁嘉怡
攝影：彭志行 陳海威
與一般樂團不同，步操樂團除了演奏音樂，亦著重視覺效果，故會加入步操及旗隊等。讀中五的巧兒是步操樂隊珀珈斯樂團的旗隊成員，中一在學校樂團接觸旗隊，亦有跳拉丁舞，不過她更喜歡玩旗。「樂趣係好大挑戰，要練力啦，做好多體能，因為係跟住音樂去玩，所以拍子感都要去練。試過塊面俾支槍鎅到啦，試過俾木槍刨走咗少少肉，但係當下興奮嘅時候，你係feel唔到嘅，完咗先發現成身傷。」
為學一分鐘動作 上網睇片過千次
逢星期日朝十晚六，巧兒都會去荃灣海盛路的橋底，參與全樂團的練習，平日亦會相約其餘四位隊員做小組操練。不過，由於旗隊在香港比較冷門，很難找到本土的專業教練。樂團三年前開始，每年都邀請曾赴美參與國際鼓號樂隊聯盟 (DCI) 的台灣旗隊導師楊方緯來港三四次，為他們訓練兩三天，朝十晚十爭取時間練習，其餘大部分時間，就靠上網看外國旗隊的片段，學習拋旗等動作。
讀中四的旗隊成員Ken說，「我試過學個動作，睇一定有超過二千次。接到支旗或者支槍，你會覺得好有成功感，好想繼續做落去，延續呢種成功感。」巧兒亦表示，學不夠一分鐘的動作，動輒最少要看過千次，「有啲拋，睇落好容易，一做上去，一拎上手係唔識做，要自己諗點樣先可以發到力。」
望投考美國樂團 回港做教練
雖然大部分時間，只能靠自己與隊員一起摸索，不過巧兒從沒想過放棄，更希望將興趣變成終身事業。她讀書成績中等，明年將會應考文憑試，然而她的夢想不是入大學，而是考入美國的步操樂團受訓，參加DCI舉辦的比賽，然後回港做旗隊教練，「去灌輸多啲正確嘅知識俾下一代，將旗隊發揚光大。」由於該比賽只讓21歲以下青年參加，17歲的巧兒計劃下年初拍面試片段，投考美國的樂團，於是更要爭取時間練習，「可能講緊spin（轉旗），每一次練我都要轉八百下以上，先訓練到自己隻手，執到自己有咩錯誤。停旗已經有三套（動作）要做，每次都係要做左右手啦，執到完美為止。一定要練好，令佢覺得我係搶眼嘅，去揀我囉！」
暑假將至，巧兒亦計劃應徵售貨員或倉務員等暑期工，自己儲錢與隊員下月飛去日本，跟去過外國受訓的旗隊導師訓練，提升實力。不過家人一直希望巧兒可更專注學業，不大支持她參加旗隊，「一開始係反對佢嘅，都驚（影響讀書），佢同我講真係好鍾意，後期見到佢咁努力，慢慢都服咗佢意思。以後成績努力啲，就十分支持。」不過巧兒相信，成功不只得一條路，「一個香港咁多人，無可能全部都係去走同一條路。雖然我做唔到佢哋想讀書成功嘅我，但係我都可以做另一個成功嘅我。」
當然，追夢也有失敗的可能性，巧兒亦有與家人商量，如將來玩旗的路不順利，可能修讀舞蹈課程，以教舞為生，或者到家人開設的童裝店幫手，雖然她對這兩條路並不抗拒，但也不甘心這麼早便放棄自己真正的夢想，「我點都想喺我擁有青春嘅時候，去完成我嘅夢想，之後再返嚟孝順父母。一定要成功！」
相關報道：
【天橋下的音樂夢】步操樂隊跳出香港
http://bit.ly/29mgKw0
【天橋下的音樂夢】打工儲錢赴美比賽追夢不靠父幹
http://bit.ly/29muQgT