《海賊王》（One Piece）擁躉今個暑假有福了！事關全亞洲首個用One Piece做主題嘅大型嘉年華今日開幕，大人細路可以盡情玩水！八方噚日率先試玩，一嚟就試玩入門級嘅滑水天梯，坐住水泡瀡落嚟，加埋微風輕吹，爽呀！鍾意追求激刺、挑戰高難度嘅玩家就梗係要玩13米高、坡度幾近90度角嘅超高滑梯，現場聽到尖叫聲不斷就知道一定好刺激。
嘉年華主打係首次引入嘅戶外體感障礙賽，玩家要過齊4關先可以攞到金牌！除咗要跳過「超長手臂」同4個彈彈波，仲要由旋轉盤跳到另一個旋轉盤，最後喺4.5米高台瀡落去，玩家少啲智力同體力都唔得。提吓大家，想玩得盡興就記得帶定多套衫或預先打底，玩嘅時候就避免着鞋或拖鞋，否則瀡瀡吓「甩拖」都咪話唔尷尬！嘉年華仲有唔同One Piece主題攤位、特色小食同紀念品！
