隨住摩連奴呢個星期上任曼聯領隊，桑馬達（圖）嘅紅魔生涯睇嚟就到終點，尤其係當摩帥喺幾日前個記招度話，朗尼未必踢前鋒，但又唔會做防中嗰陣，意味住曼聯嘅正選再冇馬達份。
正路去估，曼聯嚟緊都係踢4-2-3-1或者4-3-3陣式，而馬達係踢到兩個位，一係踢右翼，一係就進攻中場，即係中鋒後面嗰個位。不過，喺摩連奴心目中，呢兩個位都有更好嘅人選。嚟自多蒙特嘅米希達利恩可以話係速度加強版嘅馬達，同樣擅長呢兩個位置，尤其係右翼，佢最初喺多蒙特踢攻中麻麻，但上季杜曹搵佢踢右翼，成個生晒。佢上季喺德甲造出「雙雙」，射入11球同埋有15次助攻。摩帥既然搵得佢返嚟，自然係因為鍾意佢啦，點會唔重用佢呢！
右翼位冇咗，咁攻中位呢？有朗尼喺度囉。喺前幾日嘅記招，摩帥話朗尼可能唔踢九號位，但更唔會踢六號同八號位，仲話要朗尼靠近龍門啲。講咁多，答案好簡單，朗尼就係踢10號位。馬達有冇能力同朗尼爭位？以波論波，係有，但朗尼係隊長，係更衣室領袖，仲係英格蘭當今最出色嘅球星。馬達點同朗尼爭呀！可以肯定馬達嚟緊再冇正選踢。
摩帥話過，會喺四個位置增兵，艾歷拜利嘅中堅位同伊巴謙莫域嘅嘅中鋒位本身係唔夠人使，就算多佢哋兩個都唔覺擠擁，至於米希達利恩嘅翼鋒同攻中位就向來有人滿之患，所以一定有人要走。假如曼聯真係買到保羅普巴踢八號位，相信安達靴里拉同費蘭尼其中一個都要走人。
文：咖喱