今年67歲嘅工聯會「MC興」王國興，1998年起剪咗齊蔭頭，髮線突然「回歸」。八方攞住一幅MC興97年時影嘅市政局議員相片，想問吓佢「變髮」心得。佢話以前全部頭髮「蠟」去後面，睇落好老成，係老婆建議佢將頭髮染黑兼向前梳，「唔使再用頭蠟或者其他嘢。」
MC興話𠵱家每日都洗頭（唔通以前唔係？），好多人都覺得佢後生咗。但盛傳佢有植髮喎……佢澄清冇喎，只係染髮箒，「大概廿幾日染一次」，同時會修髮，「好方便，唔使吹頭，方便落區做嘢，因為真係成頭大汗」。
其實民建聯鍾樹根1997年時，亦剪咗個類似北韓金正恩嘅髮型。Tree根同八方講，90年代興電髮，唔興短髮，所以自己都走咗去電髮，「當時後生啲，頭髮多啲。」現時睇番呢個髮型呢……「梗係out好多啦，冇辦法，但嗰個年代好in㗎喎！」Tree根笑言當年個個髮型都好似梁福元咁，「電視台何守信都係咁款啦！」