美斯同佢老竇前日逃稅罪名成立,俾西班牙法院判監21個月,但緩刑執行。巴塞隆拿發聲明,佢哋全力支持美斯,信佢無辜,而美斯父子亦計劃上訴。美斯呢次惹官非,唔知會唔會令佢心淡,唔想留喺西班牙呢?車路士班主阿巴莫域治似乎想乘虛而入,據報阿巴請咗美斯老竇同經理人上遊艇傾嘢喎。另外,立立亂嘅阿根廷足協搵咗名宿奧達迪高查做教練,帶隊出戰里約奧運。佢哋亦終於公佈咗18人奧運名單,包括有韋斯咸嘅蘭仙尼、馬德里體會嘅安祖哥利亞同韋圖。