谷草這晚煞科夠晒話題，如果胡森唔係於第三場因「紅褲精神」影相飲恨做二奶，練馬師榜尾三子，就可以由頭場開始，直落各建一功攜手包辦頭兩口孖寶(頭兩場頭馬是孫達志「盈喜悅」及吳定強「原始寶石」)。
第三場四班1200米賽事，拉士鬥到難分難解，大熱門告東尼馬房的「綫路神駒」於郭能胯下貼欄領放，決勝階段則有「紅褲精神」及「百戰百勝」分從中、外檔如飛殺上，三駒最終鬥到平排衝線，肉眼看不出誰佔先。
結果2.4倍之「綫路神駒」大話夾好彩捱返終點影贏，第14次出賽首度取勝，組合獨贏A1派19.5元。
「綫路神駒」獲勝要多得「紅褲精神」鞍上人雷景勳及「百戰百勝」的羅理雅均跌鞭，影響整體發揮。其中雷景勳臨尾只用右手拍打，羅理雅則齋推，雙雙追唔過「綫路神駒」，最終「紅褲精神」、「百戰百勝」影相輸少少跑第二、三名，均只輸鼻位即一條線，認真冇陰功。第四名由「現代財星」後上取得，四重彩派6,099元。