英鎊兌港元穿咗「10算」，戀殖崇英嘅港人歡天喜地，紛紛話要去英國旅行、濕平、買樓。其實唔使開心得咁早，英鎊急跌因為英倫銀行出招，而招數料陸續有來，英鎊低處未算低。
昨日財經頭條係英倫銀行放水萬五億，嘩，好多錢！股市好友最期待的畫面出現了？可惜所謂水，只係一潭死水。今次放水，靠調低銀行之逆周期資本緩衝比率至0%，銀行資本要求將減少57億英鎊，央行話可釋放1,500億英鎊信貸。
首先，央行於今年3月才宣佈調高此緩衝比率至0.5%，明年3月實施，即係嗰1,500億英鎊根本從未被凍結，又何來釋放？其次，1,500億只係計死數，假設有25倍貨幣槓桿，但公投後的英國，企業不願投資，人才流失，信貸市場面對嘅，好可能係需求疲弱，而非供應不足。郎有心，妾無意，銀行水浸，利率再低，都未必有人借，典型嘅 liquidity trap。
公道啲講，英倫銀行呢招未至於一無是處，起碼即刻推低英鎊，有利出口、旅遊，及預防通縮。但一招肯定唔夠，遲早會減息、加碼QE。央行出手有幾重，視乎邊個接替卡梅倫任首相，如果係脫歐派Andrea Leadsom，則留歐機會渺茫，放水就要夠狠。保守黨9月初選出新首相前，英鎊易跌難升矣。
笑笑生
http://fb.com/sneeringman
本欄逢周四刊出