【扮靚籽：美容絮語】
為了迎合社交平台至少每日一post的大趨勢，不少女生時刻都會化行妝set行頭，為的是隨時自拍靚爆索樣呃like呃心。對於化妝新手，要極速變靚啲的確不易，我們特別精選新手扮靚四寶，邀請化妝學校學生Vinbe，以傳統化妝方法與四寶互相較量，看看邊樣最易用，用得最爽手！
手指指腹VS塑顏粉底掃
深入鼻翼嘴角位
「上粉底最基本的方法就是用指腹推開，以為用手指是最快靚正的方法？但原來支塑顏粉底掃可以快過隻手指上全面粉底，用的粉底液比想像中少，粉底液不會被掃毛吸走，鼻翼嘴角等細微位置掃得好仔細，上完粉底後檢視底妝並沒有掃痕留下，比起指腹推塗更均勻透薄，可以令底妝更自然貼服。」
胭脂掃VS無縫美妝蛋
任何胭脂都用到
「胭脂掃已經相當易用，只要留意沾取份量就可以，效果相當透薄。想不到美妝蛋的效果更均勻透薄，即使沾取較多的胭脂份量，只要在顴骨位來回印，胭脂顏色就好似滲出來的嫩紅，非常自然，好有驚喜！它的好處就是任何質地的胭脂都用得到。」
髮尾油VS修護造型髮捲
清爽豐盈唔扁塌
「洗頭後用毛巾抹乾頭髮後塗上髮尾油，是滋潤髮質最快捷的方法，但卻令頭髮變得扁塌。即使不懂頭髮造型，使用修護造型髮捲，只要在頭頂髮根位置向後捲梳，再把頭髮梳貼，頭髮有豐盈效果兼有光澤，最重要是頭髮清爽而不會扁塌。」
眼線液VS線條美妝器
眼線唇線一take過
「對於化妝新手，傳統的眼線液向來難掌握，畫出來的眼線總不能順滑到尾，而且很花時間。線條美妝器一物多用，既可畫眼線，又可用來作睫毛底板，能令每根睫毛塗得均勻，又不會弄花眼妝，還可以用來協助畫唇線，只要放好位置，眼線和唇線都一take過畫好。」
新手總結：畫眼線小幫手最掂
「扮靚四寶的確可在短時間內幫我扮靚啲，尤其是beautyblender 幻變線條美妝器，我還未掌握畫一條順貼尖尾眼線的竅門，最高紀錄試過畫五次才能畫到，這小幫手絕對可協助到我這些化妝新手，朝早趕返工都不會遲到。」
（a）Giorgio Armani 中環遮打大廈109號舖
（b）Joyce Beauty 金鐘太古廣場152號舖
（c）9°SPA 尖沙嘴海港城世界商業中心VITA 9樓914室
撰文：黃佩琪
攝影：許先煜
編輯：黃仲兒
美術：利英豪
場地提供：Glow Makeup Academy by Janice Lam