阿仙奴前日開操，領隊雲格主持大局，睇住禾確特、艾利尼等操練。除咗落訓練場外，雲格仲忙緊增兵，所以各位槍迷唔使擔心，日本前鋒淺野拓磨唔係最後一簽，雲格仲努力緊，打算羅致法國射手拿卡錫迪。
「銀河唯一」基奧特表現時好時壞，有時都睇到槍迷好忟憎，相信雲格都一樣咁諗，所以今個轉會窗係咁搵前鋒。喺歐國盃前，雲格「險簽」占美華迪，搞到又做笑柄。前幾日，雲格終於簽到個前鋒，點知只係日本嘅淺野拓磨！
三億解約金付里昂
喺記者會上面，淺野戴住兵工廠頸巾，係咁使出「揸波龍爪手」，真係嚇親我求大俠；但後尾了解番，原來只係我思想污穢，呢招係「美洲豹爪」先啱。21歲嘅淺野速度快，喺日本外號「美洲豹」，所以呢個係佢嘅慶祝動作嚟。不過，雲格簽日本球員嘅往績真係唔多掂，有稻本潤一同宮市亮嘅前車之鑑，仲有日本鄰國南韓嘅前鋒朴主永，相信槍迷都認為淺野只係負責幫球隊拓展日本市場，相信解決唔到鋒線問題。
唔使愁喎，雲爺爺仲未收手嘅，據英國傳媒最新報道，雲格睇中咗同鄉、踢緊里昂嘅射手拿卡錫迪。《太陽報》話呢次阿仙奴速戰速決，直接開出拿卡錫迪嘅解約金，成3,400萬鎊（約3.4億港元）咁多㗎。阿仙奴月底就會去美國踢友賽，雲格希望出發前可以搞掂呢單「刁」。25歲嘅拿卡錫迪上季都好勁，喺法甲射入咗21球，排神射手第二位，僅次伊巴謙莫域。
米希達利恩正式入「魔」
阿仙奴前日開操，但因為球壇焦點去晒曼聯新帥摩連奴嘅記者會度，所以較少人留意。66歲嘅雲格親自落訓練場，指導禾確特、哥林張伯斯、艾利尼、耶耶辛洛高等唔使踢大賽嘅球員，但我求大俠就唔見辛迪卡索拉喺度，可能呢位西班牙中場仲未好番晒啩。
至於有新帥摩連奴前日開完記者會嘅曼聯，就喺噚日開操，迪比、戴利白蘭特等球員噚日朝揸車去卡寧頓訓練基地開工，新援艾歷拜利都有嚟，但伊巴謙莫域就仲放緊假，未有出現。另外，曼聯噚日仲正式宣佈米希達利恩加盟。