新一屆立法會選舉參選人多到數唔晒，唔係全面瞓身拉票嘅話，真係唔使旨意有勝算！八方聽聞，代表民建聯出戰超級區議會、同主席李慧琼兩條隊搶灘嘅周浩鼎，近日已辭去新世界集團法律顧問職位，相信全副精力擺喺選戰，力爭超區現屬泛民嘅第五席。
八方向周浩鼎問過，佢直認主動求退，唔係被炒，而且喺六月時已經離職嘞！突然唔撈，當要同參選有關，佢話喎，唔只立會選舉、嚟緊都要多啲時間處理政治方面嘅工作，轉番去律師行做私人執業律師，會容易啲安排時間。
但查實佢去年底參加區選，及至今年初參加立法會新東補選，都用咗好多相信原本要返工嘅時間去拉票，點解當時又分身到呢？阿鼎自己解謎，話大家可能有所不知，嗰兩段時間，佢都請咗冇薪假，冇收人工㗎，覺得咁樣均真啲喎！