美斯要踎監？各位巴塞隆拿球迷放心，只係緩刑嚟，美斯下季仲可以踢西甲。西班牙嘅加泰隆尼亞法院噚日就美斯父子嘅逃稅案宣判，兩人罪名成立，同樣被判入獄21個月，但西班牙當地法例，由於刑期少於兩年，同埋只係初犯冇案底，所以美斯父子應該唔使入去坐，最多咪破財擋災罰錢。
逃得過牢獄之災，但破財就難免，聲稱唔知情嘅美斯被罰200萬歐元（約1,700萬港元）而佢老竇就被罰150萬歐元，未知佢哋會唔會上訴。案情係話美斯父子喺2007至09年間，利用離岸公司隱瞞肖像權收入，逃稅約400萬歐元。
馬天奴被拖糧唔撈
另外，阿根廷足協亦立立亂，教練馬天奴頂唔順，連奧運都唔帶，就喺前日同埋成個教練團隊請辭。馬天奴走人唔係因為美洲盃決賽輸波引咎辭職，而係阿根廷足協行政混亂，拖咗佢九個月人工。本着一顆愛國心，原本馬天奴諗住頂硬上，繼續帶，但阿根廷足協竟然誇張到仲未𠱁掂國內球會放人，奧運倒數緊一個月，都仲未定到大軍名單出嚟！一氣之下，馬天奴咪唔撈囉。家陣阿根廷玩唔玩到奧運男足都仲係五十五十，據報奧委會已經介入。
