職場最近標籤「90後」過份受港媽保護，冇責任心，唔捱得，但其實香港老闆何嘗唔係「離地富豪」，不食人間煙火？今次想分享幾個真人真事，想講下其實用啱嘅方式，老闆同後生仔一樣可以和諧共存。
好似係故事一：
一間歷史悠久嘅印刷公司，老闆帶住幾位員工去外國出差，幾位後生仔出發前不停挑老闆機，「不如去玩笨豬跳啦！」老闆一向畏高，但達目的地後，竟然鼓起勇氣去同班員工去跳！反而班員工有一半人淆底，最終得兩個人去跳。老闆事後話：「班後生仔想做嘅嘢，其實要畀佢哋做，仲要同佢哋一齊做，畀佢感覺老闆唔係得個講字！」佢又話平時寫嘢會在開頭加句「是咁的」，因為班後生仔會比較啱睇。
好似係故事二：
一間派傳單公司，老闆經常落手落腳去派，班員工仲要唔知佢係老闆，老闆話班員工大部份都係基層人士，自己落手去做可以提升士氣，減輕同事負擔。試過有部份同事返返吓工失咗蹤，過幾個月又再返工，老闆一眼睇穿：「佢哋返嚟公司後個人瘦咗，又剷咗個青頭，一睇就知啱啱坐完監啦，但我唔會踢爆佢哋，仲歡迎佢哋嚟返工，因為社會好難接納犯過事嘅人，我同佢哋一齊落街派傳單，可以傾偈，慢慢教導佢哋唔可再犯事，教埋佢哋理財，唔使欠落周身債，如果等錢使，可以借埋糧俾佢哋！」老闆咁做為乜？因為佢都試過破產欠落周身債，人生由高峯跌落谷底，更體會度年青人的難處。
好似係故事三：
一間食品公司，在偏遠地區的生意一向較差，但老闆並無亂咁捽數，反而親自落舖同前線員工跑數：「我同班後生仔講，不如咁啦，我試吓一日跑一萬蚊數畀你哋睇，如果我做到，你都都試吓啦，跑到五千就已經夠啦！」佢覺得後生仔並非「唔捱得」，只係需要適當的動力去提高工作興趣：「例如講笑咁鼓勵佢哋，今個月條數唔可以輸俾銅鑼灣！」佢又覺得年青人犯錯，唔一定要炒魷魚，只是每個人都合適的工作崗位：「例如新同事做收銀，我會試吓放多幾百元入收銀箱，如果埋數後佢冇拎嗰幾百元出嚟，即係佢收埋或計數有問題啦，咁我咪調去做貨倉或者其他部門囉，一來免得將來再犯大錯，二來畀機會佢繼續工作。」
總括嚟講，要做一位與時並進的老闆，要貼地追緊社會，不過同樣出現一個大問題，就是加人工，佢哋都覺得香港人最鍾意睇人「仆低」：「如果今年公司賺大錢，我全部人加三成人工，其實未必每個人都開心，有啲覺得自己好勤力做到成績嘅員工，會認為隔離嗰位加三成係唔應該，會唔開心。如果人哋只係加一成，而佢加兩成，佢反而會更開心！」香港人好似黃子華嘅「魚蛋論」一樣咁可悲。
斯郎
本欄逢周四刊出