六月二十九日，港交所舉行成立16周年酒會，由梁振英主禮，下午六點鐘致辭，然後祝酒，大部份人都係五點半後入場，聽完特首演講就鬆人，左丁山亦不例外，五點半就行入去萬豪酒店宴會廳，後面嗰一位竟然就係港鐵主席馬時亨，梗係第一時間向馬主席請安，然後故意贈主席一句：「林鄭司長話要對付港鐵噃？你點睇？」馬主席說話瀟灑到極，公認係公關大師級人馬，佢輕描淡寫咁答：「政府好易對付港鐵嘅啫，政府係大股東。」
咪係囉，只要政府下定決心，增持25%港鐵股票，買起晒啲小股東，跟住退市，就可以對港鐵為所欲為，將馬時亨及成班董事炒晒，由運房局官僚指揮，妥當晒！現在港鐵市值近二千三百億，約動用六百億就搞掂，容易過對付領展好多。之不過，以後港鐵嘅土地發展點搞呢？變成官營地產公司，與民爭利，幾難向市場交代噃。
馬時亨咁醒目，識講嘢，退出官場，係特區政府莫大損失，下屆政府唔知會唔會邀請佢做司長呢？此日在酒會內，近千人聚集，多是金融界、上市公司中人，左轉身、右轉身都碰到朋友或相識，卒之遇到一位主動向左丁山遞咭片，先知道佢係某某證券嘅高層，問番佢：「你唔係喺港交所做嘅咩？」呢位先生答：「離開咗咯，出去闖吓都好，希望有突破。」港交所唔係大樹好遮蔭咩？佢答：「李總裁鍾意從外面ibank請人才入嚟做主管，我地舊人唔出去試一試，升唔到高級職位㗎！」原來如此，李總裁係美資投行出身，識得猛人多吖嘛。
好咯，等到梁特首致辭，全場本應肅靜無聲，聽佢有乜發言要點嘅，點知後面數呎之遙，有兩位仁兄繼續低聲交談不絕，因冇其他人說話，呢兩位先生嘅聲音，句句入耳，甚有滋擾性，一時分神，唔多知道梁特首有冇好嘢講。但次日報紙甚少報導梁振英發言內容，咁就可能係官樣文章冇料到啦，不得不提嘅係，在公共場合有主禮嘉賓發言，即使你唔喜歡佢，都要保持禮貌，唔可以人地台上發言，你又在台下係咁噏！特首講完就祝酒，跟住立即離場，左丁山緊跟，趕搭地鐵返中環。在地鐵上又碰到從酒會走出嚟嘅基金經理Y，又係趕住返中環啫。基金Y話：「呢兩晚一定要睇埋歐洲股市，在英國脫歐之後嘅動態，今晚唔返屋企食飯咯，又試係7-11的一日。」講標準工時，唔好在中環搵食。