煞科在即，練馬師榜尾三子孫達志、胡森及吳定強都未夠15場頭馬，畢業幾近絕望。不過，孫達志卻想創造奇蹟唔肯認輸，佢繼剛周日爆冷勝出「名駒」後，這晚於谷草一開場第一場五班1200米，即憑黃皓楠操刀之「盈喜悅」建功，爆出15倍綠燈冷Win，組合獨贏A3派28元正。
「盈喜悅」在這晚谷草煞科戰全闊A欄跑道上12檔起步，原本好難跑，惟鞍上人黃皓楠落足心機發揮，沿途守三四位，直路後上贏短馬頭位，同時造就黃皓楠今季首次同孫達志合作即勝，而「盈喜悅」作為全場唯一贏過此程之馬，取得季內第二捷。孫達志季內增至11Win，最終就算續牌失敗，都可以同自己講已經盡咗最大努力，問心無愧！
現役只得兩位見習騎師，除黃皓楠之外，另一人就係蔣嘉琦，後者今場騎李廐「智能」直路一度受阻冇位出，望空後再追為時已晚僅跑第二，但20分馬有望加至21分逃出生天。三、四名順序大冷門「永恆光輝」及落飛馬「祥勝駿駒」，四重彩派37萬幾，這晚一開場就爆到杰撻撻！
孫達志表示「盈喜悅」抽得12檔形勢不利，幸而黃皓楠依足策騎指示，早段耗力不多，沒有影響馬兒末段貫注力，人馬表現出色，加上今日下雨場地鬆軟也有利，此馬今季兩Win，若非有時遇不利形勢，理應有更多頭馬。