中學文憑試放榜在即，唔少應屆畢業生開始思考未來去向，青協舉辦「休學年」（Gap Year）為概念嘅「青年就業導航GPS計劃」，畀16歲或以上中學生保留原校學籍，喺一年休學期進行工作實習，等參加者「停一停，諗一諗」，體驗工作及規劃前路。參加者完成計劃後可自行決定重返校園或投身職場。
計劃2014年推行，兩年間逾60名學生參與。今屆名額約40個，完成計劃嘅參加者可獲最高10,000元獎勵金，以便日後升學或學習職業技能。
19歲阿倫（圖左）去年7月接過「滿江紅」成績表後決定參加計劃，計劃期間曾任職8個月售貨員，佢自稱喺學校係「小霸王」，但返工時就幾乎日日俾店主鬧、仲幾乎同顧客打架，令佢明白到職場上「唔係個個都要就你」，最後決定9月新學年報讀職業訓練局嘅屋宇裝備工程課程，學習一技之長。計劃即日起接受報名至明年1月，查詢可致電3113 7999。