本屆立法會完結在即，議員都未必估到，臨尾會因為《2016年醫生註冊（修訂）條例草案》再掀風雲。做咗8年議員都神龍見首不見尾嘅怪醫梁家騮起勢拉布阻條例通過，搞到全體立法會議員噚日喺點人數鐘聲中度過。
主責嘅食衞局一班官員當然如臨大敵，唔想再好似上周咁甩轆，所以好緊張咁喺響鐘時捉住議員去開會；而噚日正式接任該局常任秘書長、D6升D8嘅政府新聞處前處長聶德權（圖）唔多好彩，一上任就遇上呢個政治炸彈要幫手拆，噚日都要去立法會作戰。佢話之前喺食衞局做過，笑稱今次唔知叫做「返新工」定「返娘家」！
聶常秘一到立法會，不停捉議員傾偈，當中唔少人以前同佢交過手，都算老朋友，好似社福界張國柱咁，當年聶德權做社署署長時，兩人不時過招，亦有唔少議員恭喜佢升職。既然咁好傾，唔知叫唔叫得郁班議員坐定定，盡快完成審議條例嘅工作呢？