華瀚健康（587）揸40億元現金，幾乎同總市值睇齊，超級現金牛，防風力有咁上下。華瀚到上年尾揸現金40.6億元現金，集團現價0.66元，比上年4月高位2.52元，累跌74%，喺三年底，就算連埋上年中供股後新增24億股股數，家陣總市值都係得49億元，現金係總市值83%。
又就算華瀚扣晒所有借款同CB債項，揸住淨現金，仍然高達33億元，接近市值70%，仍然係超級現金牛，銀彈勁厚，已經有壯大業務優勢。華瀚呢期發展醫院瓣數，而上年度，集團嚟自呢瓣貢獻，開始大額反映，溢利達到9,523萬元，佔咗總溢利5億元20%比重。隨住呢瓣發圍，華瀚多條大米路，搵真銀。
華瀚上年每股供股價1.3元，現價潛水近50%，又連供股新增股份，家陣都係得0.57倍PB。場內專業預估集團今、明兩年，得番0.54倍同0.51倍PB。
華瀚十年以嚟平均1.3倍PB，又場內搞健康產業，或者醫院醫療瓣數嘅，鳳凰醫療（1515）今、明兩年4倍同3.5倍PB、康寧醫院（2120）2.5倍同2.3倍，聯合醫務（722）2.18倍同1.9倍。華瀚無論比本身歷史平均值，或者行家PB，都平咗一半以上！
煲華瀚，當上番1字頭咁計，現價係講緊要翻半番，但集團PB都係得0.86倍，未有耐追到上邊任何行家。
錢雋
細價股專家
本欄逢周二、四刊出