上星期都講記憶體價格會不斷上調！今個星期第一日開市，又收到壞消息！
話說SanDisk的8GB、16GB卡仔，一直係市場上最熱賣平價卡種；早兩個星期大家仲可以分別用$23、$28平價入手，今個星期最新已經上調至$30、$35！而且最不幸消息係代理方面開始「封盤」！亦即店舖想入貨都入唔到，後果當然係卡價有機會進一步夾升。
另一記憶卡大牌子KINGSTON，情況感覺好一些，以最熱賣的64GB microSD（傳輸速度80MB/s），兩個星期前的售價為$95，今周最新定價已急升上$115了！而人間慘事係限量供應，例如店舖要求入貨200張，但最後到手者只有50張，以四分一的低入貨量，亦有可能進一步推高記憶卡價格。
加價三步曲！又點少得場內熱賣的電腦用RAM？據知現在的DDR3及DDR4記憶體，代理方面基本是完全斷供！換句話說亦即店舖是賣緊倉內存貨，好多舖都話唔頂得太耐！你以為店舖想加價嗎？他們表示是有錢都冇貨，想搵大家錢都難。
據熟知行情人士表示，記憶體供應鏈出現斷層，部份原因是供不應求，不過當中亦有人為因素存在；不過最令腦場人士關心者，莫如八月中的電腦節！據知這個記憶體炒價、冇貨情況，有機會持續至八月中；須知每年電腦節的最大減價Item，一向以記憶卡、記憶體為主推產品，不過今年大家可能買唔到平RAM了。
查詢：展昇（深水埗黃金商場地面42至44號舖）
記者、攝影：朱崇德