立法會九龍西選區一向係「女人天下」，上屆9張名單爭5個位，當選嘅除咗黃毓民之外，其餘4個都係女士，所以八方好唔科學咁推斷，女士選九西比較有利嘅。今屆選舉，已表態出戰九西有「顏值」較高嘅青年新政游蕙禎，而第一次以新思維牌頭考慮參選嘅狄志遠，噚日就介紹佢團隊成員，計劃排名單第三嘅彭意婷（Marie）剛滿21歲，可能係今屆最年輕候選人，仲喺理大讀緊中文及雙語學系。
Marie同八方講，雨傘運動時都有參與佔領，同好多年輕人一樣，運動過後感到迷失，而佢唔認為激進手段可以爭取到民主，所以就揀咗幫新思維做義工，3月正式入黨。
八方問過狄志遠，招攬Marie係咪覺團隊有女將會着數啲，佢笑言冇咁嘅考慮，只係想發掘更多年輕人參政，除咗Marie，團隊另一成員黃俊瑯都係得24歲，係理大學生會前會長。