民建聯近年好鍾意搞圓桌會議，探討政治、經濟、民生各方面唔同範疇，八方嘅同事亦有幸去過採訪，事關佢哋搵到嘅嘉賓份量唔細。食得唔好嘥，民記噚日宣佈將舊年三場圓桌會議嘅內容編成《百川匯》出版，佢哋仲好威威咁，搵埋特首梁振英寫序。
民記主席李慧琼噚日喺新書發佈會上話，民記之所以搞圓桌會議，係因為近年香港充斥戾氣，有啲人用激烈手法處理問題，佢哋為咗重拾理性務實，於是搞圓桌會議，等唔同意見嘅人以平等嘅身份交換意見。
成本書將出席圓桌會議嘅嘉賓開場發言寫番出嚟，內容就冇乜新意，反而民記冇將對答環節都寫埋出嚟就有啲可惜，事關嗰度先係戲肉嘛。至於梁特寫嘅序，基本上除咗對本書「表示讚賞」外亦係冇乜新意。令八方好奇嘅係，呢本書售價要128蚊，唔知大家又願唔願意拎嚿幾水出嚟買呢？