2012年立法會選舉，出戰新西嘅公民黨郭家麒拍住黨主席余若薇，以72,185最高票當選，4年後郭醫生考慮再戰新西，但佢對今年選情感到擔心，原因係泛民喺新西參選部署碎片化，加上民調顯示公民黨嘅支持度較高，擔心選民隨時改投其他邊緣泛民名單，令佢選情變得「大大鑊」。
至於上屆「超級吸票機」余若薇去向，郭醫生相信余若薇今屆主力去九龍東，為極可能首次排名單首位嘅「飛機師」譚文豪助選！郭醫生話只能希望選民會跟據自己初衷投票，又認為現時民情對整體泛民仍屬有利，因為梁振英同保皇黨過去4年實在做得太差。
郭醫生噚日帶埋有機會同佢合組名單，剛剛理大畢業、年僅23歲嘅冼豪輝見記者，阿輝話入咗公民黨3年，最希望向郭醫生學嘢，八方相信呢個組合，應該可以吸到年輕人票。