周三舉行今季壓軸快活谷賽事，睇番今季各練馬師谷草成績，沈集成以35W帶頭，以12場之差距壓倒第二位之方嘉柏，取代後者成為新一代谷草王，難得今次係季內谷草煞科戰，沈集成當然希望在自己主場多贏幾場頭馬，三匹參戰馬中，「永旺年年」、「威龍」及「大勇士」均起用近期合作愉快之羅理雅，騎練上月至今兩度合作起孖，料屬馬房出擊重心。
「威龍」四次角逐四班賽獲一冠一亞且未失前五名全獲獎金，可見目前評分有利，前仗不敵再出於三班贏馬之「傾心星」，上仗受制12檔亦跑獲接近的第四名，加強配搭可重開勝門。另外，「大勇士」上仗初配羅理雅起步大漏閘仍能憑後勁反先對手勝出，證明人馬夠合拍，今次只要出閘順利有力再下一城。
至於「永旺年年」出道十戰獲五勝三位兩第五，演出極之準繩，雖然莫雷拉無揀而改配羅理雅上陣，不過沈廐近期就有「曦世之寶」在相同配搭變動下爆冷贏馬，況且「永旺年年」最近再安排試大閘做工夫，如此積極可在唞暑前再贏一場。