民協立法會議員馮檢基除咗對深水埗長情，對太太都係癡心情長劍。一間拍微電影嘅製作公司早排喺朋友介紹下同阿基食飯，席間阿基送咗本介紹自己嘅書畀對方，書中記載咗阿基追佢老婆嘅一段長情史，而製作公司將阿基呢段情史拍成《感謝你追了我18年》10分鐘微電影，呢套電影仲會喺「辛丹斯電影節」參展，若果喺香港區贏咗，阿基呢段情史就會衝出香港到美國繼續參展。
呢套電影講番阿基多年來，多次向老婆陳敏慈示愛，阿基都係慘食「好人卡」，但阿基一直唔死心，堅持繼續追，到阿基由英國讀完書回來，佢老婆先答應同佢一齊。阿基話，片末最後一段喺佢屋企取景，拍咗一個多小時就搞掂，不過阿基強調呢條片同選舉宣傳一啲關係都冇㗎。（《感謝你追了我18年》微電影： http://www.facebook.com/18yearsoflove ）