求驗客手記︰上任記招例派金句摩佬搵普巴回家?

求驗客手記︰上任記招例派金句
摩佬搵普巴回家?

曼聯已經搞掂咗中堅艾歷拜利、前鋒伊巴謙莫域同中場米希達利恩三名新兵,但領隊摩連奴噚日親口話,仲有一個嚟緊!各位魔迷,期唔期待呀?究竟第四個會係邊個呢?唔通真係法國中場保羅普巴?

摩連奴噚日透露買人大計,話差一個就完成組軍,究竟第四個新援係邊個呢?

四個目標只差一個

摩連奴噚日舉行上任曼聯領隊後首個記者會,講到增兵計劃,佢話自己睇中四大目標,家陣已經嚟咗三個,「我哋喺四個唔同位置,揀咗四個目標,已經簽咗三個,至於第四個,我同班主、活華特一齊努力緊。」有人提佢,其實米希達利恩只係多蒙特宣佈咗,曼聯未公佈嘅,摩佬就話:「第三個未落實?放心,好快公佈。」

出席記者會前,摩連奴先出草地,拎住件曼聯波衫影相。路透社

寸雲格無冠 朗尼傳波屎

摩佬嘅第四個係邊個呢?大部份傳媒都估係普巴。英國《衞報》話曼聯願意開價8,400萬鎊(約8.6億港元)收購23歲嘅普巴,仲會為普巴提供一份周薪達25萬鎊嘅合約,但係普巴只係當曼聯係水泡,佢最想去嘅係皇家馬德里,若果皇馬唔要佢,佢先至會考慮返曼聯。至於英國《太陽報》話,曼聯話唔定會搵另一個法國中場馬度迪過檔。
摩佬個記者會都幾多正sound bite㗎,佢位宿敵、阿仙奴領隊雲格就躺着也中槍。摩佬話:「有啲領隊已經有10年未贏過英超冠軍,有啲甚至從未贏過,而我喺一年前就贏過。如果我都要證明自己的話,諗吓其他人點算好?」喺英超教咗10年同時近10年冇贏過冠軍嘅,其實咪得雲格一個。除咗雲格外,曼聯隊長朗尼亦都中槍。有記者問朗尼下季踢咩位,摩佬話:「我一定唔會叫佢遠離龍門50米!佢可能係前鋒或者攻中,甚至九號半。」但佢好似加多句寸朗尼傳波唔掂,「你哋可以讚朗尼傳波好,但如果我喺冇壓力之下傳,都一樣可以咁好。」最後,摩佬話費格遜畀咗兩個貼士佢,「佢叫我記得帶定把遮,呢個建議好好,我噚日喺訓練基地,估唔到會落大雨。第二個係帶定支靚酒喺身,因為佢話嚟緊我同佢成日有機會見面!」