巴西翼衞丹尼爾一向鍾意整古做怪，今季由西甲嘅巴塞隆拿轉投意甲嘅祖雲達斯，就改着23號波衫，要向NBA冠軍騎士嘅勒邦占士致敬；丹尼爾今次又有新搞作，為咗展示自己嘅另類腳法，扮晒功夫好手咁，右腳大力向上踢，竟然都開到啤酒樽，拍晒片嘅丹尼爾之後仲洋洋得意咁飲埋用腳開嗰支啤酒㖭。不過正所謂意外嘅嘢好難講，之前巴西中場艾美臣都試過練波時做龍門，搞到隻手傷咗踢唔到世界盃，丹尼爾有咩損傷要缺陣，祖記真係唔知出唔出糧畀佢好。