食物中毒？我求大俠都想問吓曼聯，食錯咩嘢可以搞到眼眉有條成三吋長嘅傷口呢？曼聯中堅基斯史摩寧日前喺峇里島度假嗰陣搞到入咗醫院，起初有報道話，佢係滑浪嗰陣俾水母螫傷，但之後紅魔發聲明澄清，話史摩寧係食物中毒搞到暈低。不過由網上流傳嘅相見到，史摩寧左手手掌傷咗，再戴頸箍入院，眼眉仲有一條都幾深吓嘅傷痕，睇落似外傷多過食物中毒喎！當然，都唔能夠排除係史摩寧食物中毒暈低之後撼頭埋牆，搞到破相嘅。無論點解入院都好，最緊要係家陣史摩寧已經冇事出院，可以喺印尼繼續佢嘅假期，相信佢都可以喺月底準時歸隊嘅。