今屆立法會會期7月15日結束，之後大家就開始投入身水身汗嘅競選活動，立法會噚晚趁今屆會期結束前搞Fun Day（同樂日），等議員同記者可以癲番晚，平時議事堂針鋒相對，又或者俾記者追訪追到瘦嘅場面噚晚就見唔到，反而係議員爭咪唱K，一向音樂造詣高超嘅經民聯盧偉國忽然亮出「大殺傷力武器」色士風伴奏，成功搶鏡。
議員平時發言連珠炮發，估唔到唱歌都出得大場面，公民黨梁家傑開飯前唱一曲《大丈夫》，公專聯梁繼昌唱《天蠶變》等等，確係有啲功架，但唱爆咪嘅盧偉國就最多掌聲。
叫得Fun Day梗係有嘢玩，分成記者隊同議員隊大鬥法，包括鬥快剝花生同「有口難言」，唔知係咪派得花生多，剝花生都有一手，最後呢個「花生騷」由議員隊勝出。之後就到玩有口難言，民建聯黃定光拍住三個泛民議員劉慧卿、胡志偉同葉建源，竟然出奇合拍，連「要槍有槍，要炮有炮」、「李波」等字句都估中，抵佢哋贏。
無上載免蹈CY覆轍
當然唔少得有歌唱比賽，最終冠軍由盧偉國奪得，亞軍范國威，季軍係胡志偉及梁繼昌，而即場投票由王國興奪得最好中氣獎，而最有人氣獎得主就係主席曾鈺成，不過大會呼籲兼提醒議員，唔好將唱歌片放上facebook，因為版權條例教會大家咁可能犯法，咪重蹈當年一男子覆轍呀！
李八方
mailto:[email protected]