呃like有好多種方法，荔枝角有間小店新開張，試業期間已經成功於facebook呃咗超過9000個like，到底靠啲咩呢？
就係跳樓價1蚊一包陽光檸檬茶！小店Crystal House本身位於深水埗西九龍中心，最近於荔枝角開新分店，自從6月27日在facebook公佈1蚊一包檸檬茶優惠後，facebook like數直線上升！
記者打電話查詢，負責人劉小姐表示，因新店試業，所以推出1蚊檸檬茶做宣傳賣下廣告，呃下facebook like，其實賣1蚊包檸檬茶都只係「平成本」，冇錢賺，一日仲要安排四、五個員工幫手，仲要蝕埋人工！
上次3日就賣晒，小店昨日再加推1蚊檸檬茶，已經預留咗25,000包，據上次經驗，大概第2日就賣得七七八八，唔想撲空就打電話查詢存貨量喇！至於賣晒幾時再返貨，劉小姐話要留意返facebook。
除咗1蚊陽光檸檬茶外，店內仲有其他抵買之選，維他檸檬茶及菊花茶只賣2蚊；維他奶賣2.5蚊；津路細支裝烏龍茶賣5蚊，大支裝9蚊；office必備雀巢罐裝香滑咖啡都係5蚊，仲有零食以及其他即影即有菲林等等，真係抵到爛！