即使首富李嘉誠都話今年經濟差，生意難做，但磚頭始終有價，豪宅更不乏捧場客，資深傳媒人蕭定一同樣愛磚頭。早排太古地產（1972）推售旗下西半山豪宅殷然，頂層複式就過億賣出，買家就正是中國3D數碼（8078）蕭定一。
喺堅道嘅單幢豪宅殷然，52至53樓頂層複式A室，實用面積2,575方呎，另外設有1,196方呎天台，同埋私人泳池，土地註冊處最新資料顯示，登記買家蕭定一（SHIU STEPHEN JUNIOR），單位成交價1.506億元，實用呎價5.85萬元，買家姓名與中國3D數碼聯席主席相同。蕭定一現年42歲，為影視名人蕭若元公子，除蕭氏豪擲億元買複式外，亦有不少政商人士買入殷然單位，好似前立法會議員湯家驊夫婦，最近就資助媳婦陳苑莛，以6,500萬元買入一個單位，另外，有指民政事務總署署長謝小華亦有購入殷然單位。