香港出生、喺三四十年代紅極一時、更獲得第3屆中國電影皇后嘅陳雲裳，上星期四（上月30日）喺香港屋企睡夢中離世，享年97歲。本報專欄作家邁克都有喺佢嘅專欄上提到陳女士嘅死訊。
43年息影嫁名醫
陳雲裳可以話喺本港默片年代重要藝人之一，佢主演過嘅電影《秦良玉》、《蘇武牧羊》、《木蘭從軍》、《亂世佳人》等近40部戲，當年同中國名女藝人胡蝶、周璇齊名。陳雲裳呢個藝名係由師傅易劍泉所改，來自李白詩句「雲想衣裳花想容」。到43年佢息影嫁畀港名醫湯于翰之後定居香港。12年佢同本港大馬主何壽南結為姻親，陳雲裳嘅囝囝湯聖明娶咗何壽南嘅囡囡何明懿，擺酒當晚李嘉欣同老公許晉亨、李國寶夫婦、小小超李澤楷同潘廸生夫婦都有到賀。
陳雲裳嘅死訊係由親友通知香港電影資料館，資料館方面喺截稿前仍未有回覆會唔會有任何紀念或者悼念活動舉行，向呢位一代中國影后最後致敬。
撰文：馮仁昭