政府對付領展嘅方法，正途、正宗嘅，有兩個。第一，全面國有化領展，政府再度全資擁有領展，交番俾房委會房屋署管理監督管理；第二，如不能國有化，就在領展商場鄰近，開設房委會商場及公共街市，同領展競爭，逼領展減租。除此之外，左丁山笨笨地諗唔到有乜合法嘅光明正大手法嚟對付呢間私人公司。
做唔做得到呢？梗係好難啦，領展市值在1200億元左右，倘若政府真係要回購，必須向立法會申請撥款，消息一出，全世界嘅基金都會在立法會開會辯論之時，大手掃入領展，推高基金單位價格，等定政府出價，到時，回購只會明益外國勢力，損害特區政府財政穩定性，導致聯繫匯率受狙擊，令金管局好唔得閒。任何一個有正常意識嘅行政長官，都唔會為咗領展玩得咁勁呀嗎？癲咗咩。
第二點就係說易行難，公屋屋邨旁邊如有吉地起商場，點解唔起公屋以縮短上樓輪候時間？根本就係唔夠地、冇地，講都嫌嘥氣，即使退一萬步講，真係可以興建新公共商場街市嘞，以房委會食環署過往管理街市嘅效率，根本唔係嗰皮，蝕死公帑未得天光，只會為市民及納稅人製造負資產。
梁振英、林鄭如真正要得民心，好心唔好為領展浪費時間，徒勞無功。如真有千二三億可動用，就應該建設更多公立醫院，培訓更多醫生、護士，改革醫療，引入外國大學訓練嘅醫生為香港人服務。現在香港係人都知有領展唔死得人，唔幫襯領展商場，係自己嘅決定，但有病入醫院就知痛苦，私家醫院日日全院滿座，公立醫院排隊人龍長之又長，公共醫生護士做到有氣冇碇唞，不少醫生有時做36小時一更，主要係每一個專科都唔夠人。梁振英林鄭睇唔到呢啲情況呀？林奮強不時同左丁山講，喺香港，老咗千祈唔好病，聽見呢句話就傷心。高官為何只敢指駡領展，不敢面對醫委會？醫生利益大晒乎？泛民啲議員又係冇鬼用，去領展總部示威就勇猛，去醫委會抗議就冇膽，選佢地出嚟為民請命，都幾可悲，今年9月直選投票，左丁山真係要諗清楚好唔好投俾泛民，故此涂謹申來短訊叫買民主黨獎券，左丁山冇回應。見到佢地咁樣冷待醫療改革，不敢建議引入外來醫生，心都冷晒，佢地去領展嘈喎，根本係本末倒置，輕重不分，公屋居民都未必投票俾佢地呀。