唔少英超球隊都喺今個星期一開操，通常第一日返工，啲球員都係做體測同簡單嘅訓練。好似上季英超季軍熱刺，雖然哈利卡尼同拉美拿放緊假，而洛里斯更加仲踢緊歐國盃，但基斯甸艾歷臣同新援雲耶馬等都準時報到開操，其中喺熱刺發佈嘅相入面，見到雲耶馬喺教練陪同下測試心肺功能。另外，英國《太陽報》稱射手卡尼將會同熱刺續約五年，份約總值2,500萬鎊（約2.6億港元）。上個月英媒仲吹緊曼聯同皇家馬德里爭佢，但卡尼喺歐國盃咁屎，冇晒啲轉會傳聞，佢都好可能續約。