去旅行好多人都會做好網上登機，希望節省時間，但就算搞埋電子登機証，寄運行李都總要排陣隊，再加安檢，預早個幾鐘都偶有驚險。不久嘅將來，新科技電子標籤喼或可簡化寄倉程序。RIMOWA率先推出呢款電子標籤行李箱，用手機app完成配對，再喺航空公司app做好網上登機同行李箱寄運手續，喼上面的電子屏幕就會變成電子行李標籤。去到機場更有特設自助寄倉櫃位，唔經人手就可完成整個寄倉程序。
不過新科技都要啲時間普及，暫時只有漢莎航空出到呢個電子行李tag，而自助托運站只有德國主要機場先有。咁未有航空公司對應時，個喼有乜特別？冇航班資料情況下，個芒都可顯示用家嘅姓名、電郵等個人資料，都可以show off到用電子喼神嘅潮味嘅。
電子喼神Q&A：
1：步驟係點㗎？會唔會好難用。
A：首先開RIMOWA app和按下喼內的配對開關，依指示用藍牙完成配對。再去航空公司app，依家暫時只對應漢莎航空，喺漢莎個app入面已有「smart bag」一項，可進行網上行李箱寄運手續，完成後屏幕就會出現電子行李標籤。要用到兩個app，都有啲步驟，但唔算難用嘅。
2：如果中途個喼冇電點算？
A：喼要入2粒AA電，屏幕用上E-Ink技術，只有傳送資料同屏幕出現變化時才會用電。電子標籤一經出現，拿走電池屏幕都不會關掉。
3：個電子標籤有乜用？
A：佢同平時航空公司貼喺你行李上面，有好多barcode張行李標籤係完全一樣。將來希望能對應多間航空公司，世界各地機場都有自助托運站。去到托運站，放行李上磅重運輸帶，自助掃瞄護照及指紋就可完成寄倉程序，就算超重都可以自助用信用卡付款，整個過程不經人手。
記者：司徒港燊
