英國脫歐，滙控（005）行政總裁歐智華年初曾表示，若黑天鵝出現，集團約1,000名環球銀行及資本市場業務（GBM）員工，將要由倫敦搬去巴黎。咁啱滙控GBM行政總裁安思明（Samir Assaf），現身博鰲亞洲論壇任演講嘉賓，華華當然趁此機會，請教呢位獅子行「炒房」阿頭，最新形勢及部署。
唔知係咪集團進入業績前禁語期，抑或佢老哥只想講一帶一路，遠道而來的安思明婉拒回應脫歐，連英倫銀行會否減息紓緩脫歐震盪，都笑笑口話要英國當局先知道。
不過，Samir同華華等若干老餅5年冇見，佢就興致勃勃提議，大家嚟個合照聚舊，問題就唔答嘞，確係高手。
講番一帶一路，佢話環球監管要求下，對長短錢錯配越見關注，令銀行參與長期項目融資，要格外小心風險，但佢重申，銀行仍然係當前基建融資的支持大戶，資金佔比達六成。