喺歐國盃提早走人，估唔到去度假都要提早執包袱。克羅地亞喺歐國盃16強飲恨被葡萄牙淘汰，中場拿傑迪錫之後收拾心情，帶埋老婆同兩個小朋友去當地嘅烏格連島度假散心，點知去到之後受到襲擊，有人向佢哋一家住嗰間別墅掟石，整爛咗窗口啲玻璃。拿傑迪錫都唔知係咩人做同原因係乜，係咪同克羅地亞出局有關，但就二話不說即時執嘢走人。事後，拿傑迪錫喺佢社交網站上載咗佢一家張相，話「享受假期，冇人可以拎走笑容。」