呢排好熱，天文台仲話周四熱到爆，喂呀，會溶㗎。日日開冷氣雖然舒服，但收到電費單睇怕好肉赤，而且亦加劇全球暖化。
三十幾度高溫，好難叫大家唔好開冷氣，但識得用，其實電風扇好好用。
風扇係冷氣機好幫手，因開冷氣時冷空氣會向下沉集中地面，令間屋溫度唔平均，如果你吹唔正覺得唔夠凍，會再開大冷氣。其實，只要開風扇吹散啲冷氣，會凍啲，但知唔知風扇應該放喺咩位置？對正自己吹？想冷親咩！
風扇應該放喺冷氣同一邊，然後傾斜45度咁向住對角線，可以加強室內空氣循環，冷風傳送到每個角落。點解要吹向對角線？因為呢個係屋入面最長嘅直線距離，可以增長風扇嘅送風距離，加大空氣循環。
真係唔想開冷氣，仲有一個方法，唔係開風扇向自己，啱啱相反，將風扇放喺打開嘅窗前，吹向窗外，利用「負壓」將室內熱氣送出，引入新鮮空氣。
瞓覺時開風扇，如果床下底唔係密封，可以喺床尾放一把風扇，向床底吹，空氣會經過床底再送到天花板。咁樣，唔會直接吹向自己，同時可以降低室溫。
雖然風扇都要用電，但開咗風扇，冷氣機可以較高啲溫度，根據台灣工業技術研究院模擬測試，冷氣溫度每提高攝氏一度，可以慳6%電力。而且，風扇用電大約30Ｗ至50Ｗ，但一部1.5匹冷氣機，每降低溫度2度，會增加電力消耗100Ｗ,嘥更多電。下次開咗冷氣都覺得熱，唔好較低溫度，試吓開風扇啦。
費清＃要生計，也要生活＃毋忘初衷
想輕輕鬆鬆健康啲，記住留意健康蘋台
http://health.appledaily.com.hk/