葡萄牙禮拜三就會喺歐國盃四強對威爾斯，佢哋星期日喺法國欖球隊嘅訓練基地操練，吸引大批球迷捧場。葡軍隊長基斯坦奴朗拿度（C朗）心情幾好，行埋去鐵馬度幫球迷簽名，仲唔介意揸機同球迷自拍，非常親民。C朗仲帶住班隊友，拎起咪同球迷講話多謝大家嘅支持。呢次係葡萄牙第四次打入歐國盃四強，但其中三次都被淘汰，係得04年入到決賽最後得亞軍。C朗今屆歐國盃攻入兩球，累積喺歐國盃史上射入八球，差一球就可以平柏天尼嘅紀錄。