以反圍標旗號闖出名堂嘅民主黨總幹事林卓廷，即將喺新一屆立法會選舉新東披甲上陣，講起嚟阿廷嘅「政途」可謂一波幾折。今年39歲嘅阿廷自爆99年中大政治及行政系畢業後，原本想做記者，之不過不得其門而入，「AO做唔嚟，EO又嫌悶」，加上讀政治，順勢搵議員助理嘅工，結果同民主黨結下不解緣。
阿廷話初中時唔多讀書，鍾意捉象棋同打籃球（怪唔之得咁高啦！），由細到大包拗頸，中六時做學生會，成日同校長頂頸，包括小食部點解冇熱嘢食？
做總幹事 老婆「崩潰」
公眾認識阿廷，一般係佢廉署前調查主任嘅身份，查實佢中大畢業後第一份工係喺何俊仁當年嘅屯門辦事處做職員，專門處理地區個案，跟住升做民主黨研究主任、主席助理等，後來因為不滿黨內一啲行政安排而裸辭。阿廷失業4個月，當時兩個小朋友一個兩歲，一個兩個月，生活都幾艱難，之後考到廉署，太太Winnie不知幾開心，所以當太太知道何俊仁搵佢返去做總幹事，即時「崩潰」，笑言嗰段日子壓力好大。其實阿廷同太太係中學同學，又點會唔了解對方？阿廷話佢哋中二時坐隔籬，上堂不時傾偈，中七考A-Level時仲日日煲電話粥，一考完試梗係嗱嗱臨約人食飯表白。結果如何？毋須八方多講喇啩！
