中國人好講意頭㗎嘛，但似乎九西泛民女將唔多信邪，9月立法會選舉前夕，竟然未選先「書」……啋啋啋！大吉利是、百無禁忌，查實佢哋只係出書箒。有實力就自然冇有怕，相信要爭取連任嘅民主黨黃碧雲同公民黨毛孟靜呢兩位大作家，都係咁話。
去年一場鉛水風暴，由黃碧雲率先捲起，亦同時令佢政途彈起，至今剛好一年時間。碧雲話，半年前書商主動接觸佢，叫佢寫低呢件事，結果用咗半年推出呢本《鉛水風暴》。
記錄建制官員嘴臉
佢憶述事件由最初一個記者會，搞到最終政府要成立獨立調查委員會，由法官寫報告，實在𥧌迴路轉，仲好記得當初建制派睇唔起佢嘅調查、齊齊嘲笑，官員亦反駁、蔑視其驗水結果，最後爆大鑊，人人爭相驗水，真係值得用一本書去記住呢班人嘅嘴臉。
公民黨毛孟靜就同次文化堂出版新書《飛機欖與白糖糕》，打「本土」旗號學英文，記錄本土文化。Miss Mo形容書名係「香港早一代生活的聯想」，內容講嘅係香港故事，同本土文化有關，舉例指唐樓英文係traditional walk-up，「但香港人都唔知」。佢又話「Hongkongers呢個字係梁振英逼出嚟」，指梁振英係中港矛盾加劇嘅人，話佢係「港獨之父」真係冇錯。
李八方
mailto:[email protected]