禮拜三谷草煞科戰用A欄，睇番上季7月8日谷草煞科亦係用A欄，當晚唔買內檔及前置馬註定無運行，事關九場賽事八場有一至三檔馬上名，並合力包辦逾半頭馬，而放頭入直路嘅馬更加拎到四勝三位佳績，好似「跑贏大市」、「海之濤」、「勁飛揚」及「你知我心」都係擺前放到，具前速而又抽內檔嘅馬值得優先留意。今戰列陣馬中，頭場「飛霞」唯一頭馬正是在谷A欄所得，難得抽到黃金一檔，搶出貼欄有機會先拔頭籌。另外，六場「實力飛駒」上仗於谷A欄搏失跑第二，等番同一移欄再跑，用蔣嘉琦只負107磅，憑輕磅及內檔之助有力贏馬補中。