傘運期間代表旺角潮聯小巴申請禁制令嘅律師陳曼琪早前退出民建聯，沉寂一排有新搞作，突然變身「新晉歌手」，拍住喺加拿大多倫多主修爵士樂同音樂製作嘅民建聯陳鑑林公子陳俊傑進軍「樂壇」（圖），發佈新歌《創新一天》，上載fb畀大家試聽。47歲嘅陳曼琪把聲向來幾尖，唱起歌嚟又係點？八方聽過嘞……未至於𠝹凳走人嘅，有啲師奶唱K嘅feel咁囉！反而「感激支持，真心真意永不止」嘅「正能量」歌詞，洗腦味極濃。包辦曲詞嘅陳俊傑話呀，陳曼琪半年前搵佢合作，最後搵啱佢個key，以短句為主，等佢唔會咁易走音同冇氣。臨近立會選舉前有新搞作，唔講仲以為係參選歌，陳曼琪堅稱同選舉無關，呢屆唔參選，嚟緊仲想搵人合唱。