港鐵觀塘綫延綫預計今年內通車嘞，新車站何文田亦將完工。facebook專頁MTRiders近日就有何文田同啟德新車站相片流出，圖中可見，何文田車站用咗雙色設計，來往唔同方向嘅月台牆身分別採用綠色同灰色，風格與觀塘綫其他車站設計有啲似；以紙皮石為主、焗漆板為副，但未見類似港島綫車站嘅書法字設計囉，轉車大堂就以綠色做主調同採用紙皮石設計。
網民點樣睇？似乎對新車站評價好壞參半。有人批評紙皮石設計好老土，但又有人讚有品味喎，「有80年代地鐵站feel」。較統一嘅意見係，唔少人覺得綠色主調好易同觀塘綫其他車站顏色混淆，例如樂富、油麻地同石硤尾站。興建中嘅沙中綫啟德站就用咗港島綫車站嘅書法字設計，橙色係主色，同北角站相似。